Search
  • Khaled Al-Kulaib

حرف منزلية مربحة



في السنوات الماضية بدأت المشاريع الصغيرة او المتناهية الصغر يصير لها وزن و تأثير بالمجتمعات و الاسواق. فمثلا في الكويت صارت مؤثرة لدرجة ان وزارة التجارة قامت ترخصها تحت مسمى المشاريع المتناهية الصغر عن طريق خدمة مركز الكويت للاعمال . اذا شفنا حول العالم راح نلاحظ ان الاعمال المتناهية الصغر صارت سوق حجمه محد يقدر يغفله. فمثلا في امريكا عدد الاعمال المنزلية تجاوز ال 15 مليون مشروع بالاضافة الى اكثر من 35 مليون مشروع صغير (شركة مرخصة للاعمال الصغيرة). و طبعا في اسواق كثيرة جداً توفر منصات تربط المشاريع الصغيرة او الحرف المنزلية بالزبون النهائي و هذي بعضها:


  • Etsy يربط اصحاب الحرف المنزلية بالزبون

  • Thumbtack يربط الناس اللي تقدر تقدم خدمات حرفية بالزبون

  • Fiverr يربط اصحاب المهارات المكتبية و غيرهم بالزبائن

في المملكة العربية السعودية تشجع الحكومة الاشخاص على الدخول في هذا المجال و تعطيهم رخص خاصة و كذلك موفرة منصة تربطهم بالزبائن عشان الكل يضمن حقه.


لبداية مشروع منزلي مثل هالمشاريع دور على شي انت تفهم فيه او مبدع فيه و تحب تمارسه في وقت فراغك. مثلا لو كنت طالب تقدر تسوي مدخول جانبي منه ، لو كنت متقاعد تقدر تمارس خبرتك و تستفيد منها مالياً ، حتى لو كان عندك وظيفة ممكن تستخدم مهاراتك او شغفك لممارسة هذي الأعمال ، ترى بالحركة بركة و ما تدري يمكن يكبر وياك المشروع و تطلع رخصة و تمارسه بشكل احترافي اكبر. راح استعرض معاكم بعض المجالات و اذا في بالكم شي شاركوني آراؤكم و اسئلتكم.


أفكار مشاريع متناهية الصغر

تنسيق الحفلات و اليمعات:


اذا كنت او كنتي تحبين هذا المجال تقدرون تنظمون نفسكم و تسوون حساب بالانستقرام تستعرضون فيه تنسيقات مقترحة و افكار حلوة تقدمونها. سووا لكم قائمة (منيو) للخدمات ، مثلا عيد ميلاد لعدد معين من الاشخاص و يشمل ديكور و اشيء ثانية بالسعر الفلاني و حطوا اشياء رخيصة و متوسطة و غالية لكل ذوق. ابدأ مع اهلك و جيرانك و اذا عجبهم اهم بيسوقون لك. حطوا الخدمات بالتطبيقات اللي تفتح لكم ابواب يديدة مثل تطبيق Festivity بالكويت او تطبيق رتب لي بالسعودية.

ممكن تسوون تنسيق الديكور او القعدات الخارجية و الداخلية او ترتيب طاولات الطعام و البوفيه او تسوون ألعاب للاطفال لاعياد الميلاد ، او حفلات الخطوبة و التخرج و غيرها او حتى الزوارة. و هم يمكن تأجر نطاطيات مثلا لاعياد الميلاد اذا تبي تشتري من AliExpress . في وايد افكار بهالمجال شوفوا اللي تحبونه و ابتدوا فيه.


التصميم الالكتروني:


اذا كنت موهوب و عندك ذوق بتصميم بطاقات و شعارات و اعلانات تقدر تمارس هالشي من البيت و تخدم المشاريع الصغيرة انك تدير حساباتهم بالتواصل الاجتماعي. يعني ترتب البوستات مالتهم و تحط لك رزنامة فيها المناسبات و التواريخ المهمة عشان تثري المحتوى. و الشغله بسيطة ترى تقدر تستخدم برنامج مجاني اسمه Canva ما يحتاج فوتوشوب و تعقيد. و عندهم قناة باليوتيوب تعلمك من الصفر على التصاميم.

و اذا كنت موهوب في اخراج مقاطع الفيديو هم تقدر تخدم زباين وايد بهالمجال ، تسوي لهم مقاطع دعايات او مناسباتهم الخاصة او حتى مقاطع حق اطفالهم. هم هالمجال كبير و في وايد مشاريع صغيرة تحتاج هالخدمات و انا اولهم. مشكلة هذا السوق من الصعب تحصل اللي يتكلم اللهجة المحلية يصمم لك ، الغالب يكونون من الوافدين و اذا كتبوا او تكلموا باللهجة المحلية ما راح يجيدونها. في وايد مطاعم محلية و فود تركات و مشاريع صغيرة حساباتهم في انستقرام تشوفها ما تقدم محتوى حلو و يمكن سلعتهم حلوه. لو يلاقون اللي يدير حساباتهم بسعر معقول بيختارونه.


غسيل السيارات الاحترافي:


في خدمة وايد حلوه و بسيطة و لها مردود عالي و اهي غسيل السيارة الاحترافي. يعني الزبون في الغالب بيكون من منطقتك و يعطيك سيارته لمدة يوم كامل و تسوي لها غسيل محترف. يمكن في وايد منكم شافوها بيوتيوب مثل هالمقاطع. يعني انت بتكون بالمنطقة و الناس تعرفك فمقدار الثقة اعلى من شركة او مغسلة و اذا انت تحب هالشغله و تسوي اشياء يديدة مثلا تبخر السيارة و لا اي حركة مميزة اهل المنطقة بيذكرونك و بيروجون لك. عاد انت مو تقلبها مغسلة صافي السيارات بالدور ، لا ترى ممنوع بالقانون. اخذ سيارة سيارة و جنها من سياييرك يعني شوي خشاشي.


التسوق الشخصي Personal Shopper :


هالخدمة في وايد يرغبون فيها اذا كان عندك ذوق و معرفة بتنسيق الهدوم. مثلا الزبون يقول لك انا محتاج اشتري هدوم للدوام بالشتا ، فتقوم ترتب له جدول مدة ساعة او اكثر على حسب مقابل مبلغ معين و توديه تختار له الهدوم طبعا تكون انت مجهز المحلات و الاغراض عالاقل شايفها بالانترنت قبل لا تروح عشان توفر وقتك. و مثلا تحاسب على الساعة ، كل ساعة تسوق بمبلغ معين.



توريد طعام للمقاهي و المطاعم:


مثل ما احنا شايفين في وايد مطاعم محلية و فود تركات و اللحين مع الجو الحلو هذا موسمهم. اغلبيتهم متخصصين بشي معين ، مثلا اللي يبيع البرقر مركز بالبرقر و ينقصه الحلو. اذا عندك المقدرة و المعرفه تقدر تصمم علبه حلوه و عليها ستيكر المحل او الترك و تتفق معاه انه تبعها عليه بسعر و اهو يبيعها بسعره. انت وفرت عليه وايد لانه ما راح يسوي هالمنتج ، و اذا ما انباع ما يطيح بچبده لانه بيطلب اعداد صغيرة كل يوم او اسبوع على حسب و انت فتحت له باب يديد للبيع ، صار عنده حلو بالاضافة للمنيو اللي عنده.


تنسيق الزهور :


اذا كنت موهوب بتنسيق الزهور تقدر هم تقدم هالخدمة لو عالاقل في منطقتك السكنية ، و تقدر تسوي اشتراكات ان كل اسبوع توصل للزبون. لو اول ما تبدي توزع چم وحده هدية و تختبر السوق تشوف ردة الفعل. في محلات تبيعك بأسعار الجملة بالسالمية و حولي ، و في وايد اماكن تبيعك المزهريات و الاحتياجات. و الناس تحتاج للمناسبات او يمكن يبون يهدونها او حتى يحبون دايماً يكون في بيتهم ورد.


خدمات التصميم الداخلي :


اذا كان عندك موهبة التصميم الداخلي تقدر هم تعرض خدماتك للبيوت و الشقق حولك. سواء بيسوون البيت او غرفه فيه او مكتب او غرفة اطفال او غيرهم. في وايد تطبيقات و برامج ممكن تساعدك تطلع التصاميم بشكل حلو و منهم:

و غيرهم وايد ، فإذا كان ذوقك حلو بالاثاث و التصميم هذي خوش حرفة صغيرة.


تنسيق الحدائق :


اذا كنت تحب ترتب الحدايق المنزلية ، نسق حديقة بيتكم مثلا ، او شوف لك بيت بمنطقتكم على شارع رئيسي و اتفق وياه تسوي له التنسيق ببلاش بس اهو يدفع سعر النباتات و العمال و التصميم ببلاش عليك مقابل تحط لوحة بحديقته عشان الناس تشوفها. الحدايق المنزلية تتغير بوايد مواسم ، و في ناس تبي بس حدايق جمالية و ناس تبي مع الزراعة التجميلية مثلا ورقيات و خضار شوية يستانسون عليها. و في برامج تساعدك مثل:

و غيرهم كثير ، فإذا كنت تحب هالمجال في وايد افكار تساعدك فيه و تقدر تشغل فيه وقتك و تستفيد.


ترتيب المنازل :


ما تتخيلون شكثر في بيوت ودهم يرتبون غرفهم اوو مطابخهم او كبتاتهم او حتى طاولات المكياج مالتهم بس مالهم خلق او ما عندهم وقت. هذي وحدة من الخدمات اللي اذا انت عندك الموهبة فيها و تتعلمها لو من المواد الموجودة في يوتيوب او Udemy او اي مكان ثاني اعتقد بأن راح تحصل على شغل كبير من وراها. خاصة و انت تقدم تدريب للعمالة المنزلية وقت الترتيب هذي قيمة مضافة لاصحاب البيوت انهم راح يحافظون على الترتيب حتى بعد انتهاء المهمة.

حطوا في بالكم بعض الأمور ، هذي المشاريع ماهي محلات او شركات ، هذي حرف متناهية الصغر يعني افكارها و طريقة ادارتها بسيطة جداً و لا تستحي تشتغل فيها لان اهي بداية لشي ممكن يكون كبير في يوم من الايام. راح تفتح عينك على وايد اشياء منها انك تحتك بالسوق بنفسك و تتعلم شنو اللي قاعد يصير ، حتى اذا ردك زبون او استصغر نشاطك راح تتعلم منه شي. كل الاعمال الكبيرة و العظيمة ابتدت من هذا المستوى ، ما في ولا تاجر تشوفه اليوم كبير لو ترجع بالتاريخ بتشوف ان اسلافه مارسوا هالمهن البسيطة و اهي اللي ورثتهم هالاموال الكثيرة. لا تستصغر اي فكرة في بالك او مشروع ، لكن شاور و فكر مع اللي يهتمون لك و استفيد من رايهم. و اهم شي تقبل انك تغير افكارك لان اللي براسك يمكن مو اهو اللي الناس تبيه ، فاتبع حاجة السوق و حل مشكلة موجودة و بتشوف الخير.


طبعا بما أن هذي المشاريع صغيرة وايد و معتمدة عليك بروحك ، فلازم اول شي ترتب نفسك و تحدد مصاريفك و تتحكم فيها و بعطيكم شوية نصايح تفيدكم اذا كنتوا تديرون او ناوين تديرون انشطة صغيرة.


قوقل تقدم خدمات مجانية كثيرة ووايد ما يدرون عنها ، و مع الخدمات دورات تدريبية اونلاين قصيرة و مفيدة تعلمكم على هذي الادوات. على سبيل المثال اذا عندك Gmail معاه ايي مساحة تخزين ملفات مجانية. و هم ما راح تحتاج تشتري برامج نفس Word & Excel كلها يوفرها لك قوقل مجانا. حتى الصور تقدر تخزنها بقوقل مجانا في Google Photos. انصحكم تدشون على هالموقع و تشوفون الدورات المهمة اللي تعلمكم شلون تستخدمون ادوات قوقل في عملكم.


الدفع الالكتروني صار وايد سهل و متح و انا انصحكم بشركة Hesabi شغلهم سريع و مرتب و عمولاتهم رخيصة ، هذا طبعا اذا صار عندكم مدفوعات كثيرة ، لكن اذا قليلة استخدم رابط دفع من حسابك الشخصي و بيكون كافي. و التوصيل كذلك صار وايد سهل اذا تحتاجونه تقدرون تستخدمون هالشركتين ، نزلوا تطبيقاتهم و جربوا بنفسكم. يعني اذا زبون طلب منك شي يحتاج توصيل بلغه ادخل على الابلكيشن و حط عنوان الزبون بتطلع لك تكلفة التوصيل اذا قبل الزبون زيد التوصيل على قيمة الحساب و اطلب من تطبيق الشركة و اييونك.

الحرف المنزلية مثل ما قلنا ممكن تكون بداية لقصة نجاح كبيرة ، و اذا ما ضبطت انت ما خسرت شي لان بالنهاية اغلب اللي سويته من ادوات مجانية او يعتمد على مهاراتك. و اهي بعد فرصة حلوة تشغل فيها وقت فراغك و تخلي حتى اسرتك ممكن تساعدك و تشتغل وياك ، راح تقضي وقت حلو و انت تسويها و راح تتعلم وايد منها.


نتمنى لكم التوفيق و اذا تحتاجون مساعدة او استشارة احنا بالخدمة دايما و ارقامنا و ايميلاتنا موجدة بالموقع. تدللوا بس!


كل التوفيق لكم من K Ventures.





22 views0 comments

Recent Posts

See All