Search
  • Khaled Al-Kulaib

التوصيل .... ليش عبالة؟



الكويت تمتاز بجودة تخطيط المدن و الشوارع و العناوين. ففي في ابريل من عام 1951 كلفت دولة الكويت المستشارين مينوبريو وسبنسلي وماكفارين بإعداد أول مخطط هيكلي للكويت. حيث غطى مدينة الكويت (داخل السور 755 هكتار) وامتد إلى خارج السور ليغطي المناطق المجاورة حتى الدائري الثالث (حوالي 1450 هكتار) لتشمل جميع الاستعمالات ، من سكني وصناعي وتجاري وإداري وخدمات ومرافق عامة وترفيهية ، مستعملاً في ذلك لأول مرة ، معايير التخطيط العلمية .

و جودة هذه المخططات الهيكلية و مخططات تنظيم المدن و الشوارع والمناطق السكنية وغيرها من المرافق اعطى تطبيقات و خدمات الخرائط الحديثة الفرصة بتطوير خرائط الكويت بسهولة نسبيا مقارنة مع الكثير من الدول الاخرى. و الكثير قد يلاحظ دقة خرائط قوقل و waze و كذلك كويت فايندر.


مشكلة شركات التوصيل


في استطلاع اجريته في حسابي بتويتر شاركت فيه شريحة مهتمة بخدمات التوصيل و تستخدمها بصورة مستمرة. 76٪ من المشاركين قالوا بأن شركات التوصيل على الاقل تتصل فيهم مره واحدة لطلب لوكيشن يرسلونه للسائق عن طريق واتساب على الرغم من انهم ادخلوا العنوان و الموقع وقت الطلب. و 87٪ من اللي يتصل فيهم سائق التوصيل اول مره و زودوه باللوكيشن ، يتصل مرة ثانية عند الوصول عشان يرشدونه لمكان التوصيل. برأيي ان هذه مشكلة كبيرة و تمثل إخفاق عظيم من شركات التوصيل لتقديم تجربة عميل سلسة لان الحل موجود و متوفر ومجاني كذلك.


كويت فايندر


تطبيق خرائط كويت فايندر يعرفه الكثير منكم و هو على الرغم من عدم مواكبته لتطورات تطبيقات الخرائط الاخرى الا ان الحل لمشاكل شركات التوصيل و عملاؤها تكمن فيه. و بالنسبة لمجالات تطويرة راح اتطرق لها في الفقرات السابقة في هذه المقالة.

كل بيت او بناية او مكتب او شاليه او مرفق في الكويت له رقم اسمه PACI Number و هذا الرقم فريد لكل مرفق. مثل الرقم المدني للاشخاص ، و هو يصدر عن الهيئة العامة للمعلومات المدنية. و هالرقم له استخدامات حكومية عديدة مثلا اذا ييت تستأجر مكتب لشركة تعطي وزارة التجارة هذا الرقم و لما يدخلونه بالنظام يتأكدون انه مو مؤجر لشركة ثانية و بهذا حدوا من الشركات الوهمية. و كذلك البلدية تطلبه لبعض التراخيص فيطلع عندهم مخطط المكتب و المساحات و غيره من البيانات.

هذا الرقم عادة تلاقيه معلق على طوفة البيت او البناية او المرفق ، من تعطيه حق اي احد بس يحطه في تطبيق كويت فايندر راح يوصله لي المكان بكل دقه ، و بالغالب بيكون فيه صورة للمبنى بعد. خل نجرب مثال على هالطريقة:


  • ادخل موقع او تطبيق كويت فايندر.

  • في مكان البحث حط هالرقم 91590527

  • راح تطلع لك هالنتيجة مع صور الشارع و المبنى في الجابرية.

جرب رقم بيتكم او مكتبك او اي مكان عندك رقمه المدني. مشوارك الياي قول حق اللي بتروح له دز لي رقم PACI و جرب استخدم كويت فايندر راح تلاحظ انه وايد دقيق. السـؤال ليش شركات التوصيل ما تكتفي وقت التسجيل بأسمك و رقم PACI و خلاص ، ما في ادق منه. بالرقم ترى يبين حتى اي طابق مكتبك موجود لان كل مكتب له رقم خاص فيه.


نصيحتي لكم التالي عشان نحاول نحل مشاكل شركات التوصيل:


  • ادخل على بروفايلك مال طلبات و شركات التوصيل اللي تتعامل معاها و اكتب بالملاحظات ( PACI : ***) وحط رقم المبنى اللي تبي توصل له سواءا كان بيت او شقة او مكتب.

  • اذا اتصل فيك سايق للتوصيل دز له رقم PACI و قول له يستخدم كويت فايندر.

  • اذا تعرف احد عنده مطعم او شركة توصيل او اي بزنس يوصل انصحه يستخدم نويت فايندر و يطلب من عملائه رقم PACI.

  • اذا عندك بزنس فيه توصيل ، اطلب من زباينك وقت التسجيل رقم PACI.

  • بتويتر خل نطلق هاشتاق #UsePACI و نمنشن شركات التوصيل سواءا طلبات او FEDEX او DHL او غيرهم.

  • علم اللي حولك من اهل و زملاء عمل و اصدقاء.

راح نطلق من حسابنا بتويتر هذا الهاشتاق و ساعدونا في توصيل الرسالة.


تطوير كويت فايندر


على الرغم من دقة كويت فايندر و منافعه الحالية الا انه من الممكن تطويره بشكل كبير ليكون تطبيق الخرائط الأول في الكويت ، خاصة ان المستقبل راح يعتمد بشكل كبير على الخرائط الالكترونية. حاليا شركات التوصيل و الجهات الحكومية تستخدمه لاغراض محدوده ، و بعد تجار العقار يستخدمونه يشوفون القسايم من ارقامها فسهل عليهم وايد. لكن المستقبل فيه تطبيقات كثيرة ، على سبيل المثال ، سيارات القيادة الذاتية ، روبوتات التوصيل ، رصد مناطق انتشار الأوبئة ، تحديد مناطق مكافحة حشرات معينة او قوارض و غيرها من التطبيقات اللي تتطلب وجود خرائط الكترونية. شخصيا اقترح التالي:


  • تحويل كويت فايندر الى شركة خاصة مملوكة لهيئة المعلومات المدنية و ممكن دخول شريك استراتيجي فني فيها.

  • البدء بتطوير ما يسمى بال API's لكويت فايندر عشان الشركات الخاصة تستخدمه. انت اللحين لما تدخل على طلبات مثلا بتشوف انه يستخدم خرايط قوقل و تطبيقات ثانية تستخدم خرايط آبل. هذي كلها تتم عن طريق ال API يعني قوقل و آبل يمنحون المطورين امكانية الدخول على نظام الخرائط و استخدامها. و كل مره يتم استخدامها ترى طلبات تدفع رسم معين لقوقل و آبل. فالشركة اللي راح تدير كويت فايندر راح يكون احد مصادر دخلها من ال API's اللي تعطيها لشركات التوصيل.

  • تبتدي شركة كويت فايندر بزيادة دقة خرائطها عن طريق اشراك العامه بجمع البيانات. مثلا قوقل تبيع كاميرات لاي واحد يبي يجمع بيانات و يشارك قوقل فيها. و عندهم انواع كثيره ، كاميرات للسيارات تركب داخل السيارة و موجهة على الشارع او خارج السيارة و تصور 360 درجة ، او حتى حق اللي يمشي على ريوله و يبي يصور 360 ، طبعا كل هالبيانات تنفع قوقل بأنها تجمع صور و مسارات ترفع من جودة الخرائط. هذي المنتجات موجوده على صفحة قوقل من خلال هالرابط.

  • طبعا شركة كويت فايندر تقدر تجبر كل شركات التوصيل و الباصات و التكاسي والدوريات و المطافي و الاسعاف و غيرهم انها تركب هذه الكاميرات عشان يصورون و يزودون الشركة بالبيانات لتطوير الخرايط و رفع جودتها ، لانهم بالنهاية مستفيدين من الخرايط مجانا خلال عملية التوصيل. و الافراد اللي يبي ممكن يشتري الكاميرا و يكون عنده نظام نقاط كل ما ساهم اكثر ينزل بحسابه رصيد اما يستبدله بهدايا او اي شي له قيمة يشجع الناس انها تساهم في هذا البرنامج.

مع توفر بيانات اكبر وتحسن جودة الخرائط ممكن لشركة كويت فايندر انها تسوي اتفاقيات مع مثلا وزارة الصحة بحيث ان في مواسم بعض الامراض او مواسم الحساسية يتم رصد الحالات. يعني المريض اذا راجع المستوصف او المستشفى و تبين انه مصاب بفايروس منتشر او فيه حساسية موسمية يتم ارسال بيانات معينه وهي نوع المرض و منطقة سكن المريض (بدون اسم و عنوان كامل) ، اذا راجع اكثر من مريض من نفس المنطقة و بنفس الاعراض يبين على خريطة نسميها Heat Map و يتم رصد مراكز انتشار هالمرض. و نفس الشي اذا اتفقوا مثلا مع هيئة الزراعة فيرصدون الآفات الزراعية و غيرها.


التطبيقات كثيرة و ممكن التوسع فيها لابعد حدود و لكن المهم ان يتحرر هذا التطبيق من الهيئة و يصير شركة متخصصة يديرونها اصحاب الخبرة و المعرفة و المطلعين على هذا المجال.


في الختام لا تنسون تبدون معانا بالهاشتاق و بعد نبي رايكم في هذا الموضوع ، شرايكم بكويت فايندر؟ شنو يحتاج عشان يتطور؟ ليش اغلبنا يستخدم قوقل مابز مع ان كويت فايندر ادق؟ نبي نسمع منكم ، و اذا عجبكم المقال شاركوه مع اللي حولكم.






70 views0 comments

Recent Posts

See All